Familia ya Odinga ‘yagawanyika’ kuelekea uchaguzi mkuu 2027

Raila Odinga Junior ametangaza kumuunga mkono Rais wa Kenya, William Ruto katika azma yake ya kuwania tena muhula wa pili, huku akisisitiza kuwa ataendelea kubaki katika chama cha Orange Democratic Movement (ODM), msimamo unaomtofautisha na baadhi ya wanafamilia yake wanaopinga ushirikiano wa chama hicho na Serikali ya Kenya Kwanza.

Junior, mtoto wa aliyekuwa Waziri Mkuu wa Kenya, marehemu Raila Odinga, anasema anataka kujenga safari yake ya kisiasa ndani ya ODM huku akifanya kampeni za kumsaidia Ruto kupata muhula wa pili wa urais.

Msimamo huo unakinzana na mitazamo ya dada yake, Winnie Odinga, na shangazi yake, Ruth Odinga, ambao wameonyesha kutoridhishwa na mwelekeo wa chama hicho na uhusiano wake na utawala wa Rais Ruto.

Tofauti hizo zimeibua mjadala kuhusu uongozi wa ODM, mustakabali wa chama hicho na nani anayepaswa kuendeleza urithi wa kisiasa wa Raila.

Jumapili iliyopita, Junior alijiunga na viongozi waandamizi wa ODM, akiwemo Waziri wa Madini, Hassan Joho, katika mkutano wa kumbukumbu ya baba yake uliofanyika Garissa.

Wakati huohuo, Winnie anaendeleza ukosoaji wake dhidi ya baadhi ya viongozi wa ODM ambao anawatuhumu kufadhili makundi ya watu waliovuruga hafla ya kuadhimisha mwaka mmoja tangu kifo cha Raila, iliyofanyika katika viwanja vya Migwena, Bondo, wiki iliyopita.

Katika ujumbe wake kwenye mtandao wa Instagram, Winnie anaonekana kuwalenga viongozi wa ODM ambao hawakuhudhuria hafla ya Bondo lakini walishiriki mkutano wa Jumapili mjini Garissa.

“Ni vizuri kuwaona viongozi wote wa ODM wakisherehekea kumbukumbu ya kwanza ya Baba. Walipokuwa Dubai, sisi tulipokea zawadi zao kutoka Afgoonistan! Asante. Tutalipa kwa namna inayolingana,” aliandika.

Ujumbe huo uliambatana na video iliyowaonyesha viongozi wanaohusishwa na Serikali ya umoja mpana wakisafiri kwa ndege iliyoonekana kuwa ya kibinafsi kutoka Eldoret, walikokuwa wameandamana na Rais Ruto kwenye mkutano wa kisiasa.

Miongoni mwa waliokuwa kwenye ndege hiyo ni Joho, Gavana wa Homa Bay na mwenyekiti wa ODM, Gladys Wanga, Mbunge wa Dagoretti Kaskazini, Beatrice Elachi, Mbunge wa South Mugirango, Silvanus Osoro, na Kiongozi wa Wachache Bungeni, Junet Mohamed.

Wanga hakuhudhuria kumbukumbu ya kifo cha Raila iliyofanyika Alhamisi iliyopita Bondo, huku taarifa zikieleza kuwa alikuwa akihudhuria mkutano Dubai.

Junior, ambaye ametangaza nia ya kuwania ubunge wa Kibra, anasema atatumia tiketi ya ODM kuwania kiti hicho huku akifanya kampeni za kumsaidia Dk Ruto nchini kote.

Pia, anasisitiza utii wake kwa mjomba wake, Oburu Oginga, ambaye ni kiongozi wa ODM.

“Nitabaki ODM hadi mwisho na nitatafuta uungwaji mkono kwa ajili ya kuchaguliwa tena kwa Rais Ruto nchini kote, huku nami nikitafuta kiti cha ubunge wa Kibra kwa tiketi ya ODM,” Junior analiambia gazeti la Daily Nation.

Anapuuza madai kuwa msimamo wake wa kisiasa unaweza kuathiriwa na ndugu zake waliochukua mwelekeo tofauti, akisema analenga kujijengea utambulisho wake wa kisiasa na kumuunga mkono Rais Ruto.

Kauli yake inaendeleza msimamo wa kundi ndani ya ODM linalounga mkono kuendelea kwa ushirikiano na Serikali ya Dk Ruto, licha ya upinzani kutoka kwa viongozi wanaohofia kuwa chama hicho kinaweza kupoteza uhuru wake wa kisiasa kwa kujipatanisha na Serikali.

Miongoni mwa wanaotilia shaka mwelekeo huo ni Ruth Odinga, ambaye ni Mwakilishi wa Wanawake wa Kaunti ya Kisumu. Anaashiria uwezekano wa kuondoka ODM iwapo hatua hiyo itahitajika ili kutetea misingi yake ya kisiasa.

Akizungumza katika viwanja vya Migwena wakati wa kumbukumbu ya mwaka mmoja tangu kifo cha Raila, Ruth anasema msimamo wake kuhusu haki na demokrasia una uzito mkubwa kuliko uaminifu kwa chama.

“Ikiwa kusimama na ODM kutamaanisha kujitoa mhanga kwa kila kitu ili kulinda haki, basi iwe hivyo. Ikiwa nitalazimika kuhamia chama kingine ili kuhakikisha haki inapatikana Kenya, nitafanya hivyo,” anasema.

“Ahadi yangu si kwa chama cha kisiasa pekee, bali pia kwa mapambano ya haki, demokrasia na haki za kila Mkenya,” aliongeza.

Kwa upande wake, Winnie amejiunga na kundi la Linda Mwananchi, ambalo limekuwa likikosoa ushirikiano wa ODM na Serikali ya Kenya Kwanza.

Pia, amepinga uongozi wa chama hicho na kutangaza nia ya kuwania kiti cha useneta wa Nairobi kinachoshikiliwa na Edwin Sifuna, mmoja wa viongozi wanaohusishwa na kundi hilo.

“Isibaki kuwa uvumi kwamba wakati Edwin Sifuna akitafuta nafasi za juu zaidi, mimi nimeona nafasi iliyopo. Ndiyo maana nitawania useneta wa Nairobi. Hata hivyo, sitaenda peke yangu; nitaenda na vijana,” anasema.

Junior anakiri kuwa dada yake ana haki ya kuwania kiti hicho, lakini anamtaka kutafuta tiketi ya ODM na kukabiliana na Mbunge wa Lang’ata, Phelix Odiwuor, maarufu kama Jalang’o, katika mchujo wa chama.

Hapo awali, Junior aliunga mkono azma ya Jalang’o, akisema atamuunga mkono mgombea yeyote atakayeshinda uteuzi wa chama.

“Ningependa kumpongeza Mheshimiwa Jalang’o kwa kuamua kuwania nafasi hiyo. Kama ODM, tuko nyuma yako,” alisema katika mkutano wa chama uliofanyika Nairobi hivi karibuni.

Tofauti kati ya ndugu hao haijikiti tu katika msimamo wa ODM kuhusu Serikali ya Ruto, bali pia katika suala la nani anayepaswa kurithi nafasi ya kisiasa iliyoachwa na baba yao.

Hivi karibuni, Junior alipinga juhudi za kumtangaza Winnie kuwa mrithi wa kisiasa wa Raila.

Siku ambayo kundi la wazee wa jamii ya Waluo lilimtangaza Winnie kuwa mrithi wa kisiasa wa baba yake, Junior aliungana na Jaoko Oburu, anayetaka kuwania ubunge wa Bondo, kumtembelea Waziri wa Ushirika, Wycliffe Oparanya, ambaye aliahidi kuunga mkono matarajio yao ya kisiasa.

Tukio hilo limeongeza maswali kuhusu kuwepo kwa makundi tofauti ya ushawishi ndani ya familia hiyo, wakati ODM ikijaribu kuamua mwelekeo wake baada ya kifo cha Raila.

Junior, pia, amemtetea mama yake, Ida Odinga, kufuatia ukosoaji kutoka kwa baadhi ya wafuasi wa ODM kuhusu maandalizi ya kumbukumbu ya mwaka mmoja tangu kifo cha Raila.

Ukosoaji huo ulihusu, miongoni mwa mambo mengine, matumizi ya neno “goons” (watu wanaotumiwa kufanya vurugu) na mwaliko uliotolewa kwa aliyekuwa Naibu Rais, Rigathi Gachagua, kuhudhuria hafla hiyo.

Junior anasema kamati ya maandalizi ndiyo iliyohusika na mialiko kwa kushauriana na familia, kwa lengo la kuwakutanisha watu kutoka pande tofauti za kisiasa.

“Kamati ndiyo iliyokuwa inasimamia mialiko, bila shaka kwa kushauriana na familia, na watu kutoka pande zote za kisiasa walialikwa na kamati,” anasema.

Msimamo tofauti wa wanafamilia hao umeibua hisia kuwa kuna ushindani wa ushawishi ndani ya ODM, huku mwelekeo wa baadaye wa chama hicho ukiwa chanzo cha tofauti kati ya ndugu wa Raila na washirika wake wa kisiasa.

Chanzo kilicho karibu na kambi ya Dk Oburu kiliiambia Daily Nation kuwa kuna ushindani mkali unaoendelea kuhusu nani atakayekidhibiti chama hicho.

Source link

October 21, 2026